Dar mintga di il pled al public

Couleurs locales è ina gronda famiglia, la famiglia romanda en tut sia diversitad. L’emissiun d’actualitad da RTS è vegnida lantschada ils 24 d’avust 2009. Ella porscha set dis l’emna mintga saira avant il Téléjournal da las 19.30 contribuziuns damanaivlas dal public. Grazia als svilups tecnologics èsi pussaivel da realisar ella dapi il 2017 ordaifer il studio ed uschia da s’avischinar anc pli fitg al public, ma era d’envidar quel da temp en temp.

Dapi quindesch onns dat Couleurs locales a las Romandas ed als Romands la pussaivladad da s’exprimer e da scuvrir las ritgezzas da lur regiuns. Dal punct da vista schurnalistic e tecnic è quai ina prestaziun da vaglia, in pitschen miracul quotidian. L’emissiun vegn filmada la damaun, tagliada durant il di ed emessa a las 19.00 sin RTS 1. Mintga damaun vers las 8.00 sa mettan quatter profis (reschissur:a, moderatur:a, tecnicist:a da tun, operatur:a da camera) sin via al lieu da filmar. In’emprima part dal material registrà trametta l’equipa vers las 10.30 a Genevra, la segunda part enturn las 13.30. Uschia han las montadras ed ils montaders anc temp avunda per far pront l’emissiun, per ch’ella possia vegnir emessa anc quella saira a las 19.00 sin RTS 1.

Mintgatant envida RTS il public da participar a l’emissiun, sco per exempel ils 31 da schaner 2024 a Vernier u ils 5 da zercladur 2024 a Monthey. Uschia ha var in tozzel persunas pudì assister a las lavurs da filmada. E la saira è stada envidada l’entira populaziun da vegnir sperasvi, guardar il resultat final e participar a la discussiun.

«Sco a chasa»

Rafael Poncioni, moderatur da l’emissiun a Vernier, accentuescha ch’il public è en general impressiunà surtut dals aspects tecnics sco era da la moda lucca da transmetter il cuntegn, ma era dal stretg rom da temp per producir l’emissiun. La glieud apprezieschia era la vischinanza da l’emissiun che vegn realisada en il cor da las regiuns cun schurnalist:as ch’èn preschent:as mintga di al lieu. Cura che nus dain in telefon per annunziar che nus vegnian sperasvi, è la resposta savens: «Be vegni, nus avain confidenza en las emissiuns d’actualitad che vus faschais» ed auters descrivan Couleurs locales sco in buf d’oxigen avant il Téléjournal.

Per las moderaturas u ils moderaturs na sa mida betg bler, sch’ellas u els registreschan in’emissiun cun public. Il schurnalissem damanaivel dal public viva dals contacts regulars cun la populaziun. Per quest motiv bandunan ils profis mintga di lur studio e lavuran al lieu. «Mintga di vegnin nus en contact cun il public en il lieu da filmar e pudain dar pled e fatg. En in’emissiun da quest gener han ins forsa in zichel dapli temp per quai che usità. En pli è filmar en preschientscha dal public sco dad esser a chasa», precisescha Rafael Poncioni.

Bain equilibrà

Couleurs locales sa posiziunescha sco emissiun d’actualitad damanaivla dal public per l’entira Svizra romanda. Il cuntegn ed ils lieus visitads vegnan definids cun premura mintg’emna d’ina equipa che sa cumpona da las manadras e dals manaders dals biros regiunals, da la producziun e da las moderaturas e dals moderaturs. «Nus ans stentain da chattar in bun equiliber tranter las differentas regiuns da la Svizra romanda e las tematicas preschentadas», commentescha la moderatura Fabienne Pambianco Carella. Silsuenter èsi da far la lavur da retschertga, da trametter ils invits e da scriver il text.

Cunquai che l’equipa da filmar n’ha betg temp dad ir a scuvrir il lieu, èsi essenzial da tgirar ils contacts per evitar dischillusiuns il di ch’ins filmescha. «Jau prend blera peda per discurrer cun las persunas envidadas al telefon, per definir ils aspects che nus vulain tractar e per procurar che las persunas sa sentian bain», cuntinuescha Fabienne Pambianco Carella.

In’ulteriura particularitad è quella che las moderaturas u ils moderaturs na preschentan betg exnum las emissiuns filmadas en lur regiuns. Plitost il cuntrari. Quai permetta da dar in sguard fitg varià sin il tema, perquai che la schurnalista u il schurnalist sa metta en la perspectiva d’in:a Romand:a d’ina autra regiun che la sia.

Ina vitrina da la diversitad

Era las videoschurnalistas ed ils videoschurnalists responsabels per las reportaschas realisadas durant l’emissiun sa stentan da cuntanscher uschè blera vischinanza sco pussaivel. Couleurs locales na rapporta betg mo da las actualitads regiunalas, mabain mussa en l’emissiun era las particularitads da mintga part da la Svizra romanda ed ils stgazis zuppads, sco artisanadis nunenconuschents, sa stentond da dar adina puspè il pled als umans. L’emissiun è per uschè da dir ina vitrina da la diversitad culturala, sociala, economica u politica da la Svizra franzosa. Las aspectaturas ed ils aspectaturs han l’occasiun da scuvrir u d’approfundar lur enconuschientschas davart il pajais, d’avrir portas ch’èn normalmain serradas al public.

Ils 16 d’avust è Fabienne Pambianco Carella sa rendida en la nova scola primara da la Rue des Prés a Bienna per realisar ina reportascha ensemen cun l’architect da la citad Yannick Jolliet. La citad ha cumprà il bajetg da l’anteriura fabrica Mikron ed al ha transfurmà en in cumplex da scola, in lieu cun in’estetica particulara, dal tuttafatg «biennaisa», per reprender ils pleds da Yanick Jolliet.

Per render la reportascha uschè viva sco pussaivel ha Fabienne Pambianco Carella fatg pliras registraziuns ed ha tschernì differents lieus d’intervista. Ella ha adina puspè declerà a ses giast ils differents pass da lavur ed ha integrà el uschia en la realisaziun. Tenor Yanick Jolliet enritgescha il schurnalissem da vischinanza sco quel da Couleurs locales sia lavur: «Nus lavurain in zichel en il vid ed igl è fitg interessant d’avair in’opiniun externa, mintgatant era critica, per exempel d’ina schurnalista. Quai dat er ina pli gronda visibladad a nossa lavur», precisescha Yanick Jolliet, «e nus avain perfin survegnì dumondas da persunas che vulessan visitar in u l’auter object, suenter che quel è vegnì preschentà en l’emissiun.»

Lucie Donzé, avust 2024